Almaların saplaqlarını saxlayaraq, yaxşı yuyun. Çəngəllə deşin. Şəkər və sudan sirop hazırlayın və kənara qoyun.

Qazana su töküb qoyun qaynamağa. Su qaynayan kimi almaları suya töküb 5 dəq. qaynadın. Mən çox qaynaddım, onun üçün almalar “partladı” (qabıqları soyuldu). Amma tamı korlanmadı. Almalar qaynayandan sonra onları süsgəcə tökün. Almaları qazana yığıb üstə siropu əlavə edin. 8 saat saxlayın. Mən axşam hazırlayırdım, onun üçün bütün gecəni saxladım.

Səhər qazanı orta oda qoydum. Mürəbbə 7 dəq qaynamalıdır. Qazanı odun üstündən gətirib 6-7 saatlıg kənara qoyun (axşamadək). Qaynayarkən ehtiyatla qarışdırın, üzə çıxan almalar dibə enməlidirlər.

Axşam mürəbbəni odun üstünə qoyub yavaş-yavaş qaynara çatdırın. 5-10 dəq qaynadın. Mürəbbə onda hazırdır ki, almalar kəhraba rəngini alsınlar, şirəsi isə - açıq çəhrayi.